CESJ chuan, "CS in kan ngenna a tihlawhtlin chuan sawrkar thu kal vel hriat zung zung kawngah leh Dan zah leh ngaihpawimawh chungchangah hmasawnna a thlen pawh kan beisei a ni," an ti.

CESJ chuan, Mizoram Official Language Act, 1975 a Section 3 in a sawi angin, tahrik ni 22nd June 2021 khan sawrkar lehkha kal velah Mizo tawng telh vek turin circular chhuahin nemngheh alo ni tawh a. Hei hian ngaihpawimawh a zawm a hlawh loh avangin Mizoram sawkar hotu lu ber hnenah kan thlen nawn leh a ni. Mizo mipui tam zawk hi saptawng (english) thiam lo kan ni a. Mimal leh chhungkuain sawrkar lehkha pawimawh, saptawnga ziak kan hmuhte hian kan zam chhe deuh der a, saptawng thiam lehtir a ngai a, kan bul hnaia saptawng thiam an awm remchan loh chuan kan buai chhe der, an ti a.

 Chung avang chuan sawrkar lehkhain hun leh hmun bitukte a pel a.  Hna kal vel leh a kaihnawihin a thuanawp phah thin a ni. Tin, sawrkar hnathawk zingah saptawng thiam lo tam tak an awm bawk a, an hriat tur pawimawh sawrkar thupek ngei ngei pawh an hriat loh phah thin bawk. Hetiang anih avang hian mipui kaihhnawih leh, sawrkar hnathawk tam zawk tan Dan awmsa, Mizoram Official Language Act, 1975 a Section 3 hi kenkawh that kan phut a ni, an ti.

CESJ chuan, Mizo hi hnam zakzum leh inthlahrung thei tak kan ni a. Chutiang nimah ila, Thingthlang kilkhawra cheng, chinchang hre lo zawkte pawhin office dawr kan mamawh ve thin tho a. Lo neitu leh nitina inhawlhfa chawpte’n inthlahrung leh tih dekin kan office dawr duh kan pan a, min lo chiau-autu khualchhawn an lo awm loh chuan a hreawm thin hle a ni. Chuvangin, mipui chinchang hre lo zawk office dawrtute lo dawngsawngtu khualchhawn dah ngei turin CS hnenah kan ngen, an ti bawk a.

"Khualchhawn chuan hmel hlim pu chunga ‘chhiah petu mipui chu tupawh ni se’, 'Enge i duh ka pi/pu, ka tanpui thei che em, tunge i hmuh duh ka hruai ang che…' tih an thiam bel hle tur ani kan ti bawk," tiin an thuchhuah ah an tarlang.